De Freeheit is as Schrödinger sien Katt;
Woll pupendröög, un liekers pitschenatt.
De Een bölkt: „Freeheit, aver nu of nie!“,
För’n Annern is se blot en Utopie.
Un Een glöövt Freeheit heet sien Geld vermehren,
Jüst Freeheit meent ok: „Nix mehr to verleren!“
De Freeheit is as Katt ehr Schrödinger;
En leddig Magen, doch en Buuk vull Smeer.
De Töffel pietscht de Freeheit mit: „Hü Hott!“
För’n Annern gifft dat Freeheit eerst in’n Dood.
Un Een glöövt Freeheit heet de Welt vertehren,
Blot Freeheit meent ok: „Nix mehr to verleren!“
En Freeheitskater hett nu Schrödi’s Katt;
Heel un deel nöchtern, jüst vun Kööm duunplatt.
De Een schreet: „Krieg, denn Freeheit is us Teel!“
De Anner: „Freden is dat gröötste Wehl!“
Heel staatsch deit sik de Minsch op Eer blameren.
Freeheit bedütt ok: „Nix mehr to verleren!“
Christoph Scheffler
(Mit Ideenhölp vun Beate Scheffler/Georg Danzer/Kris Kristofferson)
Illustration Bild von Bianca Van Dijk auf Pixabay
