Sporen
Heff de Synagoog an’n Bornplatz söcht –
Spoor von Leven un Gloven – weg.
Een Mosaik heff ik funnen.
Dat weer’t.
Heff den Hannoverschen Bahnhoff söcht-
Spoor von Lieden un Dood – weg.
Een Tafel heff ik funnen.
Dat weer’t.
Heff de Talmud Tora School söcht-
Spoor von Leven un Lehrn – wedder dor.
Vör de Döör heff ik Gendarms sehn.
So is’t.
Kennen
Heff mal een kennt,
de hett Fritz Honka kennt.
Hefft tohoop Koorten speelt –
Ossentoll Huus 18.
Mien Unkel hett ok Fritz heten,
hett ok Koorten speelt
un droog avends ok jümmers en Jack in
honeckerbeige.
Mit Beige, hett he seggt,
kannst du nix verkehrt maken.
Inventur 2.0
Dit is mien Cap oversize,
dit is mien Trenchcoat
casual classic un mien
Braun easy shave.
Coffee to go
kümmt mi nich an,
okayökologisch mien
Stahl-Travel-Mug.
Kloor, de Naam is
ingraveert, hett wat
kost dat Geschenk
von mien Deern.
Up mien iPhone Dateien,
blots ick kann se
finnen, krieg ick
’s nachts mal keen Slaap
in mien opblaast
Nackenküssen ut dat
Cabin Go Travel Kit
von British Airways.
Ahn Laptop geiht
gor nix. Wat ick
bedenk in de Nacht,
tipp ick rin över Dag.
Dat is mien Handy,
dat is mien Auto,
dat is mien Kreditkoort,
dat is mien Leven.
Quelle: Gerd Spiekermann: Eilander, Quickborn-Verlag, Hamburg 2022
